Zomite Cik ciang koi ah ih ciah kik nawn diam?

https://www.facebook.com/notes/tagged/

Zomite Cik ciang koi ah ih ciah kik nawn diam?

by Khai Boih on Friday, June 25, 2010 at 1:47pm ·

Cik Ciang Koi Ah Ih Ciah Nawn Diam?



I. Thuphatna

Tulaitak pen Zomi te leitungbupah ih tai ngeingei laitak ahi hi. “Minbang pianna Pupa Zogam” nusia in “Minthang Malaysia” ah “galtai” min pua in a tai zo teng ih tai ngeingai hi. Atai zo lo teng bekmah ih gamah om lai dan hi. Fashion pi khat hong suak a, gamdang tailo te mibanzolo bang khat suak hi. Nidangin gamdang pai ding hong kikhak ahihmanin kuamah ih pai zo kei hi. Gamdangpai khat peuh om leh nasia ih sa mah mah hi. Tu leuleu ciangin ut peuh in ih pai ta hi. Hih thusunna pen critical pian mahmah ahihmanin, limtak nangaihsutsak ciat ta un. Zomi te' kalsuan zia movement pen socio-religio-political perspective lam pangpan etna hi a, sia hi pha hi ci in deihkaihna bias bangmah kihel lo hi. Ngaihsut kak ding deihna bulpi ahi hi.



II. Kawlgam Zomi te’ Role En Pak Le’ng

Zomi te tangthu 800AD pawl en kik le’ng, nidang in tu a ih Zogam cihna ah teng masa hi lo h’anga, zanggam mah pan galtai to khin ih hi hi.

1500 masiah Kalay, Kabawl Valley ah sawt pi ih om khit ciang, khamtung Ciimnuai ah ih pu te na tai uh a, tua pan in mun tuam tuam ah kikhen kik in, minam, beh, le phung tuamtuam ih suak hi.

1890s British te hong tun’, sangmang te hong pai khit ciangin mibangin ih civilized to pan a, Pasian biakna Christian ngeina sungah ih nei thei hi. Ngeina lui sunga animism upna te nusia in ngeina thak sungah Tapidaw akici Kawl kammal zanghin Christian ih suak to to hi.

1940s Japan gal hong tun’takciangin Zomi te ki khantohna hong kilamdang hi. Khamtung Zogam ah motorcar khawng hong tung to hi. Pasal te’n sam met in, numei te’n nik tual teng ta hi. Lai le pilna manphatna thei in sang inn ih hanciam mah mah hi.

Suaktakna ngah hun ciang Kawlgam tawh ih kipawl a, U Nu Parliament hun sung 1950s pen “leitung hoih lai hun” ci in ih ciamtek hi. Nutakna nuam ih sa mahmah a, khua bang mah ih phawk kei hi.

1960s Bo Ne Win Revolution hun sungah zongh Zomi te khua ih phawk nai kei a “Bo Gyoh Ni Vuan, zingvaihawmna, Doh Bama Pi, Kil bang khang hen, kil bang khang hen aw!” ci in ningzu aisa tawh thupha ih pia ngekngek hi. 1967 kum in Kawlgam bup an tang neek ding hong kicin’ nawn loh tak tek, hunhaksa hong tun’lam ih phawk kha pan hi.

1970s BSPP hun U Ne Win party khat bek ukna nuai ah, Zomi te’n Chin State cih gamke pi khat athu in ih ngah a, Ne Win vaihawmna nuaiah bangmah tang ngam lo in ih om ciat hi. Socialism hoih maw hoih lo cih thei peuhmah loin Zomi te’n an kham lo ih hihman in Kawlzangah akhua akhua in lal ngeingai hi h’ang. RTB le RTC ih cih motor pi te tawh zanggam pan antang hong puak to zel hang zongh, kicing zo tuan lo hi.

1980s hun sung, Socialist Economic hun sung Zomi te sumbawl ding mit kihong in, Bombay le Zangkong visa kullo in “na-le-hmuh” tawh ih kawm ziahziah thei a, Zomi sumhau tampi ih om hi. Hih hunsung ah biakna lam kha khanlawhna nasia takin ih nei hi.

1990s SLORC hun sung ciangin, sumbawlna hong hoih nawn lo leuleu in, gamdang zin hun hong tung ta hi. Passport kipia a, gamdang kong ki hong ahihmanin, Zomi te gamdang ih pai ziahziah ta hi. Nasem sumthalawh ding le Lai Siangtho sangkah dingin ih tampai pen hi.

2000s SPDC hun sung pen UNHCR te’ hong hanciampihna tawh REFUGEE hun hong tung leuleu ta hi. Malay kumpi te phalna le deihsakna om peuhmah lo pi in, “Minthang Malay” ci in Zomi te’n inntual in ih zangh zihziah bek ta hi. “Kawl kumpi gilo ihneih khak, Zomi te’ thupha” ih ci nuam ding hiam? A tai zo tengin “galtai” ih suak zo bek a, atai zo lo te ih gamah a ki nusia suak hi.



III. 2010s: Zomi Diaspora maw; Kawlgam Kitelkik Hun?

Tu laitak Kawlgam kitelna thu tawh ih buai mah mah laitak ahi hi. Gamsung kitelna ding vaitawh kisai, gampua pan ih buaipih ciat mah mah hi. Gam thumna tung khin te le tungnai lo Malay ah thaam lai tengin, Kawlgam democracy ngah takpi le ih ciah kik nawn diam? Nuntakna haksat manin India lamah ana lal to khin uh ih sanggam Zomi tampi na om a, tua te pen tulaitak Kawlgam Zomi te thu ih gen ciang, amau kihel lotawh kibang zel hi. Tu laitak Malay le leitungbup ah Zomi te galtaina ah amau kihel lo uh hi. Nung in Carey Tuangpu in alai at na khat ah Meitei gal hong pian pen Zomi te’ thupha hi, India lam te le Kawlgam lamte kilomkhat thei nading hi ci in gelh hi. Zomi te in ih gam le lei ih it takpi hiam? Ahihkei le, leitung khankhat sung nuntak nading gamnuam khat ah peem lel ning ih ci hiam?

Zomi Diaspora?

Nung in Dr. JM. Paupu in a research bawlna ah hi banga Zomi te leitungbupah ih kithehthang pen, twenty-first century Zomi evangelical diaspora akici thei diam? ci in dotna hong nei a, ke’n zongh dawnna pawlkhat ka pia hi. “Zomi in diaspora for World Evangelism” thulu bang in tu ni Zomi te kalsuan takpi hi le’ng lungdamhuai mahmah ding hi. Tu ni in Zomi te leitungbup Evangelism ding ih ngaihsun hiam? Ahihkei le gilpi khapkhat ading nuntakna nuam zawdeuh mun zong ih hi zaw hiam?

First century Judeo-Christian te leitung mun tuamtuam ah akitheh thang na pen, CHRISTIAN UPNA KISUKSIAT hang hi a, gilkial man leh an khamlohman hi lo hi. Twenty-first century Zomi te tu ni in, leitungbup ih tun’na pen CHRISTIAN UPNA KISUKSIAT PAULAM a, atatakin gilkial, ankhamloh man ahi zaw hi. Zomis are today seeking a better life by applying asylum for refugee status.

Akua akua ci loin UNHCR te’n CHIN minam ahihnak le Kawl kumpi’n biakna tawh bawlsia hi cih thu sang thei ahihman in, Zomi khempeuh PASIAN MIN le CHRISTIAN BIAKNA MIN suangin REFUGEE GAMBEEL ngah ding ih hanciam mahmah laitak hun ahi hi. Zomi te pen tang om minam hi loin , kipawl om minamte ahihman un atun’tun’na mun uah, biakna bawlin kipawlna nei uh hi. Tua kipawlna biakna te ah Zokam pau Zomi te bek kipawl ahih zel ciangin Pasian thugen pen minamdang te ading hi thei lo zel hi. Minamdang te kiangah Pasian thu gen ding ih kithawi ta hiam? Ahihkei leh, midang te' hong muhna ah "Zomi te'n Pasian thusungah nungta thei tatak nai lo uh hi, amau le amau peuh ki suamsuam lai mawk uh hi" ci in, midang te' Pasian thu genpihding kisam lai te peuh ih hi lai zaw kei hiam?



IV. Thukhupna: Mai lam Zomi te’ Identity

Kawlgam sungah Zomi te’ identity kician pen, CHIN-CHRISTIAN hi. Leitung mun tuamtuam a om Zomi te’ identity pen bang ahi ding hiam? Ih peemna gamah ih second generation te in tenna gam te’ kampau hong siam mahmah ta ding uh a, tu ni a nungta lai teng ih om nawnloh hun, third generation, fourth generation ciangin “Ka pu/pi pen Bumese te ahih kei le Asian te hi cih ciang khawng hong hi ding hi. Ih Zopau apau lai zongh in US a te bang, American awsuah khat tawh pau ta ding uh hi. Europe a te’n European awsuak khat tawh Zopau hong pau malmal kha ngel ding hi. Tu ni in Tedim khuasung khangno te pau pen nidang a Tedim pau tawh awsuah kikhai mahmah khin a, nidang ciang Tedim kam ih cih Tedim khuapi sung pau pen aw tuampi khat hong hi ta ding hi. Tua hun ciangin, leitung mun tuamtuam a om Zomi khangthak te le Zogam, Kawlgam, Vaigam a om Zomi akici te Zokam tawh akihopih thei lai diam? Tua hun ciangin Zomi te' identity pen CHIN-CHRISTIAN mah ahilai diam?

Gamdang a, migam nuam mahmah vantunggam abang gam ah akhangkhia Zomi khat in tanglai pupa gam ahi Zogam Chin State ah ciahkik ding amangmat lai ding hiam? Tua hun ciang, tu hun Chin State pen Zomi te' teen na Chin State mah ahilai na diam? Tu ciangciang Zogam pan a khangkhia kawlgam ah ulian suak te kuamah Zogam aciah kik om nawn mel lo hi. Gamdang, na khempeuh abaihsa kicinna ah suakin akhang khia khat in bang mah kicin lohna Zogam ah aciah nuam nawn diam?

Cik ciang koiah ih ciah kik nawn diam?

Naalian Zomi thupi mahmah ei... mailam ah zong thu hoih tuamtaum ong suaksak zel oo maw lawm....

June 25, 2010 at 3:24pm · · 1

ZOMI LEH PILNA

1. Pilna Ih Cihin Bang Hiam?cskhai
Pilna ih cihin degree sangpipi neihna himasalo hi. Zomi pawlkhatte’n Ph.D, degree ngahte , mipil in ih ciamteh hi. Khiallo na pi in, dikkhinlo hi. Ih pu ih pate in laisinlo, siamsinlo, Ph.D degree cihte neita kei leh uh, na pil mahmah uha, u leh nau kizopna, khua leh tui kizopna leh vaipuak nasepnate ah a dihmun uh nazo pha mahmah uh hi. A taktak in, siamna om a, siamna khitciangin pilna om hi. Pilna ih a tawpna ah ciimna om hi. Mipil hihding sangin mi ciim hihding a kisam zaw a hihi. Mipil pawlkhat te ciim khinlo uh hi. A hizongin pilna leh ciimna a thuahkhawmte ahih leh kuamah in zozo lo ding hi. Ciimna bek ih thupitsak  samhangin, pilna tawh a ki thuah kei leh, saupi paizo tuanlo ding hi. Pilna in ciimna tawh a ki thuah kei leh, a langbai khe tawh ki bang hi. Ph.D thuap 2, 3 ih nei phial zongin ciimna tawh a ki thuahkei leh mite thusimna leh, mite muan leh suan kisuak zo thei taktak lo ding a hi hi. Zato siavuan (medical doctor) te sepkhelh lei kivukna a, mipil haite sepkhelh, mihaite ki vuk hi. Siamna leh pilna zong thupi mah, ahi zongin a thupi penpen in ciimna tawh ki thuah pilna ahi hi.  (Hong nusia sa Rev. Hau Za Cin (Zangtui) in ZCLS Meeting ,October 1999, Kalaymyo Baptist Church ah Sermon a piaklaitak in tu laitak a laigelhpa zong va ki helkha a, laigelhpa in ama ciapteh dan in hong suahsak kik ahi hi.

2.  Pilna Bangci Zon Ding?

Greek mite sungah Socrates, Plato leh Aristotle te mipil, misiam, thu ngaihsutsiam inki ciamteh uh a, a minthang vangvangte a hi uh hi. Zomite in mipil a ih gen Pu Song Theu tawh ki bang kha dingin ka ngaihsun hi. Khat vei Greek gam Athen khuapi sung a om, singkungpi nuaikhat Socrates tawlnga in tu hithiat hi. Socrates pen Greek mite sungah mipil mahmah khat a, a ki ciamteh hi a, mite in zahtak in a minthang mahmah khat a hi hi. Tua bangin Socrates singpi nuai, tutna tungah sunkim laitak tawlnga in a omlaitak in, tangvalno khat hongpai      
a:
‘’Socrates aw, bang na cih leh pilpeuhmah na hiam? Na pilna, na kisindan na thusim hong gen dih in ‘’ ci in tangvalnopa in pilna a ngahna dingin tua bangin thu a dong ahi hi. Tua ciangin, Socrates in, tua tangvalno kiangah ‘’pilnnuam takpi na hiam?’’ ci hi. Tangvalpa in
‘’pilnuam takpimah ing’’ a cihciangin, ‘’ka nung hong zui in’’ ci in ki zuisak a, tuigeiah paipih hi. Socrates in tua tangvalpa; tuisungah  paipih a, tanngvalnopa maitang tuisungah phumcip hi. Tangvalpa tuisungah a omciangin nak theilo ahihman in, a nuntakna ding in a thaneihzah in diangin, kitom a, tua ciangin suakta hi. Tua khitciangin Socrates in, tua tangvalno kiangah ‘’tuisungpan na suahtak theihna ding, na sihloh na ding, na kitom a, na hanciam bangin pilna zongin hanciam le cin mipilna suak ding hi’’ ci  hi.Man hi. Dik hi. Zomi te misangin ih pilnop zawk a, ih siamnop zawk leh mite sang in hanciam zawk, kulkal zawk, tha leh ngal gimzawk, tawlzawk zek mah kisam ding hi. Khuaulte zong mitesangin a luanzawk zek kisam ding dan na hi hi. Khatvei USA President a 16 napa, Abraham Lincoln suahni khatin USA
gamsung ah limsuaih kidemna om hi. USA gamsung a om sangnaupang tampi te in tua kidemna sungah ki helciat uh hi. Tua limsuaih kidemna sungah a khatna a ngah   sangnaupangpa pen Los Angeles pan ahi hi. Tua pa in hih bang in limsuai hi. Bi inn kisia nipniap khat suaimasa hi.(Abraham Lincoln khankhiatna innneuno, bi inn a gennopna a hi hi). Tua bi inn ii a tung inches, letmat 4 ding khawng a ki halna ding mun ah USA President te zumkahna, Innkangpi (White house) lim khat suai hi. Tua ban ah tua bi innsia khat leh Innkangpi (White house) kahlei khat tawh kizom sak hi. Tua bang teng a suaih khitciangin, tua kahlei tungah, laigelh a, ‘’ kahleitung ah a kahnuamkhempeuh  kikah thei lai hi. A hi
zongin a dawndong, a tawp dong tuna dingin khuaul nakpi in luan kul/kisam hi’’ ci hi

Zogam bekah omnawnlo in, Zomite nisuah, nitumna, sak leh khang ah ih ki khenlaitak in, pilna sinna ding hun a neinawn lo nu leh pate a hih leh thutuam hi. Tua hilo a, khangno pilna sintheihna ding hun a neilai khangnote in, pilna mah ih zon masak tangtang ding thupi ding hi. Ih gam ih lei ah ih omlai in, bangmah siamna leh theihna ih neihloh hangin hong ki simmawh tuan khollo hi. Migam ah ih omciangin pilna neilo, siamna neilo a ih ompen na mahmah hi. Mite in hong sim mawh in, mite utloh nasep teng kisem kha hi. Pilna, siamna sinding zong a thubaih lo khat ahi hi. A hizongin Socrates in tangvalnopa tuisung ah,
aphual takciangin, a nuntak theihna dingin, tangvalpa in hanciam in,  thasana, suahtakna a ngahbangin, nuntak nuamzaw, nuntak lemtang zaw ih ngah theihna ding leh mite  simmawhna ih thuakloh na dingin pilsina, siamsinna thupi ngaihsut in, hanciam ni.

3. Zomite Kisap Infrastructure Himasalo, Pilna

Zogam, Kawlgam sungah khantohna a om theihna dingin lampi ki bawl in, lei ki bawl hi. College, University building hoihpipi kilam hi. Inn sung vanzat, setzung (factory) sung vanzat infrastructure hoih nono ki nei hi. Inn hoih pipi kilam a, infrastructure hoihnono a sungah kikoih kizang hi. Lungdam huai mahmah hi.

Ih Zogam ah lampi hong kipuah in, sanginn hoih, hotel leh vanzat hoihnono hong kizat ding, hong kipuah ding, infrastructure hoihnono zat ding ih lunggulh mahmah hi. Lunggulh ding mah ahi hi. A hi zongin tua te sangin ih kisap zawk in siamna leh pilna a hi hi. Germante thu kizakna News sungah ka simkhak thu khat kong hawmsawn nuam hi. China
te in Africa gam Congo, Tanzania, Zwimbabwe gamte ah sumtampi bei in investment bawl uh hi. Lampi bawlsak in, leibawlsak uh a, mawtaw bawlna cih bang a kipan setzung (factory) hoihno no lamsak, bawlsak uh hi. Ih gen gam thumte lampite hoihmahmah, factoryte zong hoihmahmah hi. Lungdam pih hang. A hi zongin China te’n a pilna uh hawmlo uh hi. Hihgammite a dingin China te in pilna investment bawlsak lo uh hi.
Abawlsa uh lampi te kisia ta, a bawlsa uh factory (setzungte) te kisia ta, ih gensa gam thumte in tua lampi leh setvan te, a bawlkik theihhna ding un, pilna kicing neilo uh hi. China te bawlsaksa nate a mawkna pi hongsuak ta hi.

Tua hi a, Zogam ah factory kisam hang, inn leh lo, lampi hoih ding, kizopna nuam ding thupi mahmah hi. Infrastructure hoihnono te ih innsung ah zangzo ding cih zong thupi na pi in, tua te sangin, ih gen infrastructure te bawltheihna pilna ih kisam zaw hi. Paunak ah, Mite
ngasa napiak sangin, ngasa matdan sinsak in a kici thu pen, thu dik a hi hi. Pilna leh siamna a omnak leh infrastructure hoihnono te in hong zuan ding hi zaw hi. Tua man in, ih gam ih lei ah ih kisap in, infrastructure hoih nono te himasa kei, pilna leh siamna hi, ih cihna tua hang a hi hi.


Khup K. Thang @Thangneu
BBA,MUAS, Myaungmya
Myanmar
www.zomidaily.com